Кæфты мæйы 16-æм бон ОБСЕ-йы сæргълæууæг, Швейцарийы ФХъМ-йы сæрдар Иньяцио Кассис Гуырдзыстонмæ балцы фæлгæтты бабæрæг кодта Хуссар Ирыстонмæ хæстæг арæнгæрон территори.
Ныгуылæйнаг политиктæн, кæцытæ бабæрæг кæнынц Тбилис, ссис æдзухон нæ арæнмæ хæстæг бацæуын. Уым радон хатт бафхæрынц Уæрæсе æмæ Хуссар Ирыстоны, Гуырдзыстоны та равдисынц «æнаххос амæттаг»-ы хуызы.
Ахæм экскурситæ фылдæр сты «политикон туризм»-ы хуызæн æмæ æвзарын кæнынц дызæрдыгдзинад. Стыр фарста æвзæры ОБСЕ-йы объективондзинад æмæ Швейцарийы нейтралондзинадмæ. Ахæм балцытæ уавæр стабилон нæ кæнынц, фæлæ ахъаз сты, цæмæй Тбилис дарддæр дæр политизаци кæна гуманитарон фарстатæ æмæ йæ цæстытæ ‘хгæна уæвæг æцæгдзинадыл.
Не стæм разы, хуссарирыстойнаг-гуырдзиаг ахастытæ æрбæстон кæныны, уый нымæцы Фæскавказы æхсæнадæмон дискусситы фарстаты пайда кæй цæуы æнæраст терминологи, уыйимæ. Радон хатт нысан кæнæм, афтæ хуыйнæг «административон хахх» кæй у Республикæ Хуссар Ирыстоны паддзахадон арæн. Фæзынд гуырдзыстоны агрессийы фæстиуæгæн.
Паддзахадон арæн æрбæстон кæныны фарста у æрмæстдæр нæ мидхъуыддаг, кæцы здæхт у æмбæстæгты æдасдзинад бахъахъхъæнынмæ. Делимитаци æмæ демаркацийы фарста политизаци кæныны фæлварæнтæ радон хатт æвдисынц кæцыдæр æхсæнадæмон структурæты субъективондзинад.
Сидæм ОБСЕ, швейцариаг минæварад æмæ иннæ æхсæнадæмон структурæтæм, цæмæй хæст уой объективондзинад æмæ нейтралитеты принциптыл. Зæрдыл лæууын кæнæм, регионы стабилондзинад æмæ æдасдзинады фарстатыл æрдзурынæн иунæг эффективон формат кæй сты Æхсæнадæмон дискусситæ. Æрмæстдæр уым хъуамæ цæуа дзырд æппæт проблемæтыл, сæ нымæцы арæнты æдасдзинады фарста дæр.
Сидæм гуырдзиаг фарсмæ, цæмæй æрæвналой конструктивон куыстмæ. Арæны иумæйаг делимитаци æмæ демаркаци, кæцы Тбилис афтæ уæхскуæзæй æвдисы уазджытæн, ахъаз уаид бирæ фарстатæ аскъуыддзаг кæнынæн.
Хуссар Ирыстон цæттæ у диалогмæ, фæлæ уымæн уæвæн ис æрмæстдæр уæд, кæд æмæ нымад æрцæуой нæ паддзахадон суверенитет æмæ йæ интерестæ.
2026 азы кæфты мæйы 20-æм бон