ОБСЕ-йы Сæргълæууæг, Финляндийы Фæсарæйнаг хъуыддæгты министр Элина Валтонены Гуырдзыстоны территориалон иудзинад æмæ суверенитеты ‘вварс фидиуæнтæ сты сыдывд æмæ сæ зыны уæлæнгайдзинад.
2008 азы кæфты мæйæ фæстæмæ æдасдзинады фæдыл дискусситы хайадисæг цы организаци у, гуырдзиаг-ирон конфликт æрбæстон кæныны фæдыл минæвар цы организаци уыд, уый радон дискусситы раунды хæдразмæ уæддæр хъуамæ уа дипломатондæр.
ЕЦ-йы цæстдарджыты миссийыл куы дзурæм, уæд та хъæуы банысан кæнын уый, æмæ сæ «диссаджы куыст» рæстæгæй-рæстæгмæ æркæны Хуссар Ирыстоны паддзахадон арæны фехæлдмæ. Афтæ гæнæн бынтондæр нæй, уымæн æмæ цæуы уавæры дестабилизаци.
Хъыгагæн, кæддæр номдзыд организацийы минæвæрттæ уæвæг æцæгдзинад æмæ Республикæ Хуссар Ирыстоны уæвынадыл сразыйы бæсты азæй азмæ кæнынц ныхасæппарæнтæ, кæцытæ сæхи дæр нæ уырнынц. 2008 азы майрæмты мæйы агрессоры сабырадмæ æркæныны фæстиуæгæн Уæрæсейы къухдариуæгад цы уынаффæтæ рахаста, уыдонæн фæивæн нал ис. Уый иу æмæ дыууæ хатты не 'рцыд загъд уæрæсейаг фарсæрдыгæй. Хуссар Ирыстон æмæ Уæрæсейы 'рдыгæй дывæрсон ахастытæн ис фидар бадзырдон бындур, кæцы æппæтварсонæй дзуапп дæтты æхсæнадæмон барады нормæтæн, се 'хсæн республикæйы территорийыл уæрæсейаг хæстон контингенты уæвынады фарстатæ дæр.
Сидæм ОБСЕ æмæ æндæр æхсæнадæмон организацитæм, цæмæй ныхасæппарæнты бæсты æрдзурой актуалон регионалон проблемæтыл, æмæ, фыццаджыдæр, Гуырдзыстоны 'рдыгæй Хуссар Ирыстон æмæ Абхазы æдасдзинады гарантийы фарстатыл.
2025 азы кæфты мæйы 15-æм бон