Сообщения МИД РЮО

Кæфты мæйы 1-3 бонты Ирыстоны цæуынц Беслæны æрцæугæ æвирхъау терактæй 20 азы рацыды охыл мысæн мадзæлттæ. Уыцы трагеди ссис Уæрæсейы ног историйы æппæты уæззаудæр æмæ æбуалгъдæр цаутæй иу.

2004 азы рухæны мæйы 1-æм бон Беслæны скъолайы Зонындзинæдты бæрæгбоны рæстæджы террористтæ амынæттæй систой ахуырдзауты, сæ ныййарджыты æмæ ахуыргæнджыты. Скъолайы агъуысты фыдгæнджытæ æртæ боны дæргъы дардтой 1128 адæймаджы. Æртæ боны адæм хъизæмарæй мардысты æнæ хæрд æмæ æнæ донæй. Цыфыддæр фыдракæнды амæттæгтæ баисты æртæ сæдæ адæймагæй фылдæр – се ‘хсæн сывæллæттæ æмæ сылгоймæгтæ.

Рухæны мæйы 2-æм бон Республикæ Хуссар Ирыстоны Консулон агентады Дзæуджыхъæуы ацыд Горæт Цхинвалы Администрацийы сæргълæууæг Хуыгаты Ромео æмæ горæт Градары (Италийы Республикæ) мэр Филиппо Гасперийы фембæлд, кæцы Беслæны трагедийæ 20 азы рацыды охыл мысæн мадзæлтты хайад райсынæн æрцыд делегаций сконды Республикæ Цæгат Ирыстон-Аланимæ.

Фембæлды ма хайад райстой Дзæуджыхъæуы уæвæг РХИ-йы Консулон агентады Сæрдар Санахъоты Морис, РХИ-йы ФХъМ-йы Æддагон бастдзинæдты управленийы Сæрдар Джиджджойты Таймураз, РХИ-йы ФХъМ-йы Минæвар Италийы Мауро Мурджа.

Майрæмты мæйы 26-æм бон Республикæ Абхазы ФХъМ-йы ацыд Республикæ Хуссар Ирыстоны Фæсарæйнаг хъуыддæгты министр Джиоты Æхсары æмæ Республикæ Абхазы Фæсарæйнаг хъуыддæгты министр Сергей Шамбайы фембæлд.

Фембæлды хайад райстой Республикæ Абхазы Фæсарæйнаг хъуыддæгты министры Хæдивæг Одиссей Бигвава, Абхазы ФХъМ-йы Стратегион æмгуыстады департаменты Сæргълæууæг Джемал Бганба, Республикæ Хуссар Ирыстоны Уæлвæткон æмæ Æххæстбарджын Минæвар Республикæ Хуссар Ирыстоны Боциты Олег.

Майрæмты мæйы 26-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар хайад райста Абхазы фыццаг Президент Владислав Ардзинбайы Мемориалмæ, кæцы ис Сухумы районы хъæу Дæллаг Эшерайы, афтæмæй ма Абхазы дыккаг Президент Сергей Багапшы уæлмæрдмæ Очамчырайы районы хъæу Джгярдайы дидинтæ сæвæрыны церемонийы.  

Майрæмты мæйы 26-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар хайад райста 1992-1993 азты Абхазы адæмы Фыдыбæстæйон хæсты Фæмардуæвджыты мемориалмæ дидинтæ сæвæрыны церемонийы, кæцы ацыд Сухумы Кады Парчы, Уæрæсейы Федерацийы ‘рдыгæй Республикæ Абхазы Хæдбардзинадæй 16 азы рацыды цытæн. 

Церемонийы ма хайад райстой РХИ-йы Парламенты Æддагон политикæ æмæ æхсæнпарламентон бастдзинæдты комитеты Сæрдар Дриаты Заза æмæ РХИ-йы Парламенты Экономикæ, чысыл амалкæнынад æмæ хъæууон хæдзарады фæдыл комитеты Сæрдар Къуезерты Арсен.

Майрæмты мæйы 26-æм бон Уæрæсейы Федерацийы ‘рдыгæй Республикæ Хуссар Ирыстоны Паддзахадон хæдбардзинады банымадæй рацыд æхсæрдæс азы.

Хуссар Ирыстоны ног историйы ацы ахсджиаг бон баст у 2008 азы майрæмты мæйы трагикон цаутимæ. Уæд æппæт æхсæнадæмон бадзырдадты сæрты ахизгæйæ, Саакашвилийы фыдракæнд режим расидт гæрзифтонг конфликт æмæ йæ разы сæвæрдта хæс, цæмæй æнæбасæтгæ ирæтты фесафа зæххы цъарæй æмæ Хуссар Ирыстоны та фестын кæна «сыгъдæг быдыр».

Майрæмты мæйы 25-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар кусæгон балцимæ æрцыд Республикæ Абхазмæ. Джиоты Æхсарыл сæмбæлд Республикæ Абхазы Фæсарæйнаг хъуыддæгты министры Хæдивæг Одиссей Бигвава.

Балцы фæлгæтты Республикæ Хуссар Ирыстоны Фæсарæйнаг хъуыддæгты министрад æмæ Республикæ Абхазы Фæсарæйнаг хъуыддæгты министрады ‘хсæн цæттæ цæуы 2024-2025 азтæм Консультациты пъланы бафыст.

Майрæмты мæйы 21-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар райста йæхимæ Кавказы æбæрæгæй чи фесæфт, уыдон фарстаты фæдыл Сырх дзуары æхсæнадæмон комитеты (СДÆК) Минæвар Агнес Котуйы.

Фембæлды хайад райстой Хуссар Ирыстоны Фæсарæйнаг хъуыддæгты министры фыццаг хæдивæг Цхуырбаты Андрей, Хуссар Ирыстоны Президенты Фæсконфликтон фарстатæ æрбæстон кæныны фæдыл Æххæстбарджын Минæвары хæстæ ‘ххæст кæнæг Коцты Егор, Хуссар Ирыстоны Президенты цур адæймаджы барты фæдыл Æххæстбарджын Тасойты Инал.

СДÆК-æй – Æдасдзинады хайады кусæг Тедеты Нана.

Майрæмты мæйы 19-æм бон Республикæ Хуссар Ирыстоны Фæсарæйнаг хъуыддæгты министр Джиоты Æхсар хайад райста тымбыл фынг «Уæрæсе æмæ Хуссар Ирыстоны æмахастытæ: историон хъуыды æмæ глобализацийы æрсидт»-ы куысты, кæцы ацыд  Уæрæсейы Федерацийы ‘рдыгæй Республикæ Хуссар Ирыстоны хæдбардзинады банымадæй 16 азы рацыды цытæн ХИПУ-йы.

Мадзалы организатортæ уыдысты Тыбылты Алыксандыры номыл Хуссар Ирыстоны Паддзахадон университет Цæгат-Кавказаг Федералон университетимæ иумæ.

Майрæмты мæйы 8-æм бон, Гуырдзыстоны ‘рдыгæй Хуссар Ирыстоны ныхмæ хæстон агрессийæ æхсæрдæс азы рацыды охыл мысæн мадзæлттæ ацыдысты Хуссар Ирыстоны Фæсарæйнаг хъуыддæгты министрады фæсарæйнаг уагдæтты дæр. 

Мæскуыйы Ирвæзынгæнæг Чырыстийы Аргъуаны ссардтой гуырдзиаг агрессийы рæстæджы фæмардуæвæг Хуссар Ирыстоны цæрджыты рухс нæмттæ, афтæмæй ма Цхинвалы хъахъхъæнджыты, ирон æмæ уæрæсейаг Фидауынгæнæг тыхты хæстонты, уæрæсейаг æфсады солдаттæ æмæ офицерты рухс нæмттæ, кæцытæ сæ царды аргъæй хъахъхъæдтой Хуссар Ирыстоны.

Майрæмты мæйы 7-8 бонты Республикæ Хуссар Ирыстоны цæуынц Хуссар Ирыстоны ныхмæ Гуырдзыстоны хæстон агрессийæ æхсæрдæс азы рацыды охыл мысæн мадзæлттæ.

Майрæмты мæйы 7-æм бон ацыд къамты равдыст «08.08.08 – 08.08.24», афтæмæй ма Хетæгкаты Къостайы номыл Паддзахадон драмон театры 1920 азы ирæтты геноциды фæдыл спектакль «Фæстаг æвдисæн». Уый фæстæ мемориалон комплекс «Хуссар Ирыстоны хъахъхъæнджытæн»-ы раз ацыд мысæн церемони, кæцыйы рæстæджы акцийы хайадисджытæ сæвæрдтой дидинтæ мемориалмæ æмæ фæмардуæвджыты рухс номыл ссыгътой цырæгътæ.

Æхсæрдæс азы размæ, 2008 азы майрæмты мæйы 8-æм боны æхсæв, гуырдзиаг гæрзифтонг тыхтæ «коллективон Ныгуылæны» æххуысæй æрбабырстой фынæй Цхинвалмæ. Фыццаг цæф сæхимæ райстой Хуссар Ирыстоны хæдæфсæддонтæ. Æхсæнадæмон мандаты хъахъхъæнынадмæ нæкæсгæйæ, атакæгонд æрцыдысты уæрæсейаг фидауынгæнджытæ дæр.

Цхинвалы хъахъхъæнджыты æмæ уæрæсейаг æфсады хъæбатырдзинады фæрцы гуырдзиаг æфсæдтæн нæ бантыстис сæ тугæйдзаг операци «Сыгъдæг быдыр» сæххæст кæнын.